Að njóta sumars og íslenskrar náttúru

Það er fátt sem tekur fram hinu íslenska sumri.   Tíðarfarið sem leikið hefur við okkur þetta sumar , upphefur tilveruna svo um munar   Að njóta náttúru landsins við þessar aðstæður er sannarlega orkugefandi.  Ég  fór um síðast liðna helgi til Grundarfjarðar. Tilefnið var að fara í kayakróður frá Grundarfirði og um svæðið þar um kring. 

 Magnaður staður Grundarfjörður. Bakgrunnurinn með stórbrotin fjöll Snæfellsnesfjallgarðs , þar sem Helgrindur gnæfa yfir .

 Kirkjufell - miðnætursól

    Og síðan hið stórbrotna  Kirkjufell, sem útvörður byggðarinnar- einstakt og ekki að undra þó hinn danski kóngur hafi ætlað staðnum veglegt kaupstaðavægi á sínum tíma.  

 

 

Lagt í róðurinn í blíðviðri - Kirkjufell

 

 

 

 

 

 

 Um átta kílometrum norður af Grundarfirði og  sem einskonar útvörður er Melrakkaey. 

Melrakkaey rís úr sæ

Eyjan er alfriðuð frá árinu 1971.  

Og aðalmarkmið okkar kayakfólksins , alls 9 talsins , var að taka land í Melrakkaey.   Leyfi fyrir landtöku höfðum við fengið hjá Umhverfisstofu , en við vorum á ferðinni eftir varptíma fugla.   Fresta varð för um einn dag vegna hvassviðris, en sunnudaginn 27 júlí 2008 gerði blíðviðri og ekki eftir neinu að bíða með róðurinn.

Róið var norður með Kirkjufellinu og útaf Kvíaós var stefnan tekin á Melrakkaeyna.  Eftir um tveggja klukkutíma róður var komið að eynni.

 
Toppskarfar á stuðlabergssillum

Stórbrotin aðkoma- Melrakkaey er í raun einn stór stuðlabergsstöpull og með gróðurþekju að ofan.  Lundinn var í þúsundatali á sjónum , skarfar og ritur.  Allar klettasillur og stuðlabergssstöpplar þaktar toppskörfum í hundraðatali.

Aðkoma okkar kayakfólks truflaði byggðina ekkert , allt var með spekt.   Landtaka á eynni er aðeins möguleg á einum stað og  hann þröngur.  Lítill súgur var við eyna svo landtaka var auðveld.  

 

 Spakur toppskarfur í Melrakkaey

Og þegar upp í fuglabyggðina var komið var okkur tekið sem góðum gestum. Það var nánast hægt að ganga að toppsköfrunum og klappa þeim- slík var spektin.  Lundabyggðin var síðan í grastónni , hola við holu - einhverjar þúsundir.  Merkilegur fugl lundinn, lifir 9 mánuði á hafi úti og verpur síðan í löngum moldarholum sem hann grefur sér og erfast lunda fram af lunda...

 

 

     Ritan á sína staði og allt í sátt

Á öllu þessu var ljóst að þessi langa og virka friðun hafði heppnast - fullkomlega.

Viðhöfðum það á tilfinningunni að okkar aðkoma þarna væri sem landnámsmenn höfðu kynnst í árdaga.

 

              Krossnesviti

 Og að lokinni góðri dvöl í Melrakkaey var stefna sett á Krossnesvita og síðan tekið land utan við Lárós skammt frá Búlandshöfða og lukum við róðrinum þar.    Alls um 18 km. kayakróður

Mögnuð sumarferð um óspillta íslenska náttúru. 

 

 

Athugasemdir

[Helena Mjöll Jóhannsdóttir, 8.8.2008 kl. 02:16]

Sæll Sævar! Vá, þetta hefur heldur betur verið frábær ferð hjá þér. Skemmtilegar myndir. Sjálf hef ég verið dálítið á Snæfellsnesinu og einmitt skelt mér í siglingu þarna norðar á nesið.... Kv. Hmj;)

[Sævar Helgason, 8.8.2008 kl. 11:48]

Takk fyrir innlitið , Helena Mjöll.   Það leynast víða gullmolar á landinu okkar.

Kveðja