LÍÚ sægreifar berjast gegn strandveiðum sjávarbyggðanna.

Segir strandveiðar sóun á verðmætum

Friðrik J. Arngrímsson, framkvæmdastjóri LÍÚ segir strandveiðarnar sóun á verðmætum, hvar sem á sé litið

Í skýrslunni sem um ræðir kemur fram að aðeins 56 prósent forsvarsmanna fiskmarkaða og fiskkaupenda telja að gæði þess fisks sem barst á landi í strandveiðunum síðasta sumar standist samanburð við annan afla.

Friðrik segir að allt of margir bátar hafi verið að veiðum með tilheyrandi offjárfestingu. Þá standist gæði stórs hluta strandveiðiaflans ekki samanburð við annan afla sem berst að landi. Svör kaupenda staðfesti það.

"Í strandveiðunum voru aflaheimildir og þar með atvinna tekin af fyrirtækjum og sjómönnum sem starfa allan ársins hring til þess eins að afhenda öðrum, sem svo skiluðu lakara hráefni til vinnslu og þar með lægra verði. Þar er enn einn ein birtingarmynd sóunarinnar," segir Friðrik.    ([e-mail]).

--------------------------------------------------------------------------------------------------

Já það virðist sem engir geti veitt fisk af einhverju viti og arðsemi nema Sægreifar LÍÚ sem hafa einokun á öllum fiskveiðum innan 200 sjómílna landhelgi Ísland.

Dragi einhver fisk aðrir en þeir þá  ganga þeir af göflunum. Strandveiðar sem stofnað var til sl. vor gengu mjög vel fyrir sig um landið en afli að sjálfsögðu misjafn eftir landshlutum.

Vestfirðirnir komu best út- enda gjöful fiskislóð og stutt á miðin.

Og aflinn var lyftistöng fyrir vinnu fólksins í sjávarbyggðunum sem kvótaólögin eru búin að rústa ,um tíðina.

Friðrik LÍÚ agent vitnar í fiskkaupendur og segir 56 % þeirra vera óánægða með gæði fisksins. Ef satt er segir það þá ekki sögu af brottkasti Sægreifanna- að þeir velji aðeins það besta og verðmætasta á markað-hitt fer í hafið aftur.Kvótinn er freisting til þannig umgengni um auðlindina.

Strandveiðibátarnir eru líklegri til að koma með allan aflann að landi- velja ekki úr. Sjálfur stunda ég fiskveiðar utan kvóta og  kem með allan afla að landi-engu hent.

Nú er barátta LÍÚ sægreifanna að hefjast gegn endurnýjuðum strandveiðiheimildum og þeir berjast sem ljón gegn veiðiheimildum á skötusel utan kvóta . Og þeir hóta að sigla fiskveiðiflotanum í land og binda við bryggju- hætti ríkisstjórnin ekki við fyrningu aflaheimilda.

Það á að taka þennan kvótakaleik af Sægreifum LíÚ og afhenda eigandanum íslensku þjóðinni. Braski sægreifanna með fiskinn  verður að ljúka hið fyrsta. Upphafið að hruninu er hægt að rekja til gjafakvóta og framsals veiðiheimilda .

Mál að linni.

 

 

 

 

Athugasemdir

[Ragnar Eiríksson, 16.1.2010 kl. 17:35]

Eins og þú bendir á er enginn vandi að skila góðri vöru þegar stórum hluta - því lakasta - er hent í sjóinn aftur!    Voru ekki aflandsviðskipti með gjaldeyri líka merki um "heiðarleika" kvótaeigenda, varla hafa strandveiðimenn getað stundað slíkt með sinn vonda fisk!!!     Það ber allt að sama brunni, þetta lið svífst einskis og eins merkilegt og það nú er þá verja margir sjómenn þetta lið með kjafti og klóm!     Maður lendir varla í verri sóðakjöftum en sjómönnum að verja útgerðarmenn!!

Ragnar Eiríksson

[Jóhannes Laxdal Baldvinsson, 16.1.2010 kl. 19:10]

Sæll Sævar, ég sagði strax og þessar hugmyndir um strandveiðar voru viðraðar að það þyrfti að tryggja gæði við meðferð aflans vegna þess að ég veit hversu mikilvægt er að slægja aflann og kæla sem fyrst og ekki hvað síst á sumrin þegar fiskur er í æti og mikið los í holdinu. Þessar áhyggjur mínar reyndust á rökum reistar því aflinn var ekki kældur. Það þýðir ekkert að bera því við að ekki sé hægt að kæla fiskinn því vel er hægt að útbúa krapakælingu. Á þvi hafa verið gerðar tilraunir og það er örugglega til teikningar af svona krapakerum sem hægt er að láta steypa eftir. En þetta kostar auðvitað pening og því verður að skylda menn með reglugerð hvernig fara skuli með aflann. Annað sem fór úrskeiðis í sambandi við strandveiðarnar var að þá leyfðist mönnum sem selt höfðu frá sér kvóta að fiska í þessu kerfi og í þriðja lagi þá gátu bátseigendur leigt frá sér úthald gegn prósentu í afla og varð þannig til ný stétt sjómanna, sannkallaðra útgerðarmanna, samkvæmt fornri skilgreiningu.  Strandveiðar þurfa og eiga að stuðla að nýliðun þeirra manna sem vilja fjárfesta í útgerð og gera hana að lifibrauði, en ekki sem leiguliðastétt, manna sem stunda færaskak sem sport í sumarfríum.

[Ragnar Eiríksson, 16.1.2010 kl. 23:22]

Það er nú líklega hægt, og verður vafalaust bætt úr þessu - var þetta annars ekki fyrsta árið sem strandveiðar voru leyfðar?!      Þær eiga að skapa þeim sem þær stunda tekjur og ég sé nú ekki að það sé svo vont að leigja sér pláss á bát.    Og þessir sem hafa selt frá sér allan kvótann - er ekki rétt að fá páfann til að bannfæra þá svona til að ganga alveg frá þeim?     Þetta eru augljóslega mjög vondir menn - eitthvað annað en þessir sem bara leigja kvótann frá sér á okurverði - það eru góðir menn!  Er það ekki??

 Ragnar

[Sævar Helgason, 17.1.2010 kl. 14:53]

Meðferð á afla og kvótamál eru óskyld efni. Það á að gera strangar kröfur um meðferð á öllum afla sem veiðst innan landhelgi Íslands.

Og því á að fylgja strangt eftir.

Þeir sem koma með fisk að landi sem ekki hefur fengið 1. flokks meðferð eftir að hann er úr sjó dreginn - eiga að fá aðvörun og síðan sviftingu veiðiheimilda. Á nútíma er engin afsökun til fyrir slæmri umhirðu um afla. Ís er allstaðar að fá. Kælibúnaður í báta er ekkert vandamál-það er ekki kostnaðarsöm tæki. Blóðgun og slæging ásamt þvotti strax á eftir er að sama skapi öllum auðvelt.

Fiskur er matvæli sem er mjög viðkvæmur fyrir allri óvarlegri meðferð. Mínar fiskveiðar eru með þeim hætti að blóðgun , slæging og sjóþvottur fer fram inna 2ja min. frá þvi fiskurinn kemur um borð.

Frá hausti og fram á vor er sjór það kaldur að fiskigeymslan í bátnum hefur sjávathita 0-6 °C - það útheimtir ekki ísingu með.

Að sumri breytist þetta og þá er ískæling nauðsynleg. Síðan þegar í land er komið fer aflinn í kælingu í gömlum kæliskáp (um) við 3 °C í einn sólarhring meðan dauðastirðnunin er að fara úr holdinu. Eftir það er lokavinnsla, hver sem hún er. Fyrir liggur fyrsta flokks fisk hráefni.

Þeir sem stunda atvinnuveiða og selja á markaði eiga að vera undir ströngu eftiliti með gæði.. Það er yfirvalda að stýra því. En burt með núverandi kvótaólög og brask. 

Takk fyrir málefnalegt innlit.