Friðun Langasjávar fagnað af Græna netinu

"Græna netið, félag jafnaðarmanna um náttúruna, umhverfið og framtíðina, fagnar friðlýsingu Langasjós sem er nú orðinn hluti af Vatnajökulsþjóðgarði ásamt hluta Eldgjár í Skaftártungu. „Þetta eru merk tíðindi í sögu náttúruverndar á Íslandi og efla enn stórfengleik og aðdráttarafl stærsta þjóðgarðs í Evrópu,“ segir í tilkynningu. "
Lesa meira

Tekið er undir með Græna netinu varðandi friðlýsingu Langasjávar- eina af dýrmætustu náttúruperlum Íslands.

                                          Friðsæll kayakróður á Langasjó-Fögrufjöll

Fagna friðun Langasjós

Athugasemdir

[Sindri Karl Sigurðsson, 19.2.2011 kl. 14:11]

Friðanir eru af hinu góða, eins langt og þær ná. Þær friðanir sem viðgangast hér á landi hafa oftar en ekki þýtt að myndin að ofan, sem er alveg stórfengleg, hefði aldrei verið tekin einfaldlega vegna þess að ekki má fara að, á og í námunda við hið friðlýsta nema á tveim jafnfljótum.

Það má alveg hafa það í huga þegar verið er að hampa náttúrufriðunarfólki.

[Sævar Helgason, 19.2.2011 kl. 15:35]

"Náttúruvernd

Hvaða reglur gilda um heimsóknir á friðuð svæði?

Fullt svar:

Til eru friðuð svæði eins og Surtsey og Eldey sem ekki má heimsækja nema með sérstöku leyfi en skipulag flestra friðaðra svæða er miðað við að sem flestir komi að njóta þeirra."

Þetta er svar Umhverfisráðuneytis. Þú fullyrðir að aðgangur að Langasjó yrði bannaður ef hann yrði friðaður og t.d bátsferðir óheimilar. Þetta er rakalaust bull. Aðgengi allra að Langasjó er gott. Það væntanlega batnar. En vegakerfi fyrir akstur með eða kringum Langasjó verður vonandi aldrei-þá er þessi náttúruperla stórskemmd. Erlendir ferðamenn meta fyrst og fremst hina óspilltu fegurð sem Ísland hefur uppá að bjóða og mörg okkar hin innfæddu eru að uppgötva þetta líka. Ferðamennska og tekjur af henni fara aðeins vaxandi. Því verðum við að gæta okkar gersema. Síðan getur ferðamennska breyst mjög hvað farartæki snerti-olían hækkar og hækkar og færri geta ekið bílum. Þá kemur not fyrir fæturna. 

[Sindri Karl Sigurðsson, 19.2.2011 kl. 16:56]

Ekki veit ég hvernig þú getur lesið fullyrðingu úr mínum skrifum, með eða án hjálpar. Ég er einfaldlega að benda á að friðun og friðun er ekki það sama.

Er það t.d. friðun að setja af stað gerð skógrægtarlaga með það að leiðarljósi að landið verði áfram í besta falli hríslur og melar?

[Þórir Kjartansson, 19.2.2011 kl. 18:31]

Friðun Langasjávar og Fögrufjalla er mikið fagnaðarefni. Þetta er eitt allra stórfenglegasta og fegursta svæði landsins. Hins vegar get ég alveg tekið undir með Sindra að því miður hefur víða verið pottur brotinn á friðlýstum svæðum með óþörfum lokunum og  algeru banni við því að bæta bæði aðgengi fólks að og á þessum stöðum.  Því miður hefur framkvæmdin á þessu orðið til þess að margir sjá rautt við það eitt að heyra friðlýsingu nefnda.  Það eitt og sér hlýtur að vera Umhverfisstofnun og ráðherra umhverfismála mikið umhugsunarefni.

[Sævar Helgason, 19.2.2011 kl. 19:32]

Sindri !

Ég hef eflaust of eða vanskilið það sem þú vildir sagt hafa. Ég biðst velvirðingar því. Ég er enginn öfgamaður í friðlýsingum. En sumstaðar eru friðlýsingar með ströngum kröfum eins og t.d á Hveravöllum varðandi hverina, nauðsynlegar- svo dæmi sé tekið.

[Sindri Karl Sigurðsson, 19.2.2011 kl. 20:58]

Enda hef ég ekkert á móti því að svæði séu friðuð. Þetta er einfaldlega spurning um hvernig það er gert. Ég hef ekki kynnt mér sérstaklega friðun Langasjávar en eins og Þórir kemur inn á þá er ekki hægt að beita "tilgangnum sem helgar meðalið" á friðanir svæða utan alfaraleiða.

Það sem er skítt við all þessa umræðu er hve erfitt er að koma henni upp á plan þar sem hægt er að nota rökræðu. Tilfinningar eiga ekkert heima í þessari umræðu, að mínu viti.

[Sindri Karl Sigurðsson, 19.2.2011 kl. 21:00]

Hvar fær maður svona tveggjamanna kayak?

[Sævar Helgason, 19.2.2011 kl. 21:08]

Sindri !

Þessi kayakmynd er tekin 2007 í ágústmánuði í ferð Kayakklúbbsins á Langasjó. Við vorum um 9 saman. Þessi kayak sem myndin er af er í eigu hjóna sem voru hluti hópsins. Kayakklúbburinn.is heldur úti vefsíðu og inni í henni er sölusíða-þar er hægt að auglýsa eftir svona bát-án kostnaðar.